امام علی رحمان، رییس جمهور تاجیکستان، حین صحبت هایش در مجلس عالی جمهوری تاجیکستان در کنار توجه و اهتمام به مسایل کشوری، در باره سمت های اساسی سیاست داخلی و خارجی جمهوری تاجیکستان توضیحات داده از روند صلح افغانستان حمایت نمود.
رییس جمهور تاجیکستان افزود: حفظ صلح و ثبات و تأمین امنیت پایدار در منطقه آسیای مرکزی، طوری که بارها تأکید کرده بودم، در سرخط اولویّتهای کلیدی سیاست خارجی دولت ما قرار دارد.
پرزیدنت جمهوری تاجیکستان نقش برازنده کشور جمهوری تاجیکستان را در عرصه بین الملل حایز اهمیت دانسته، گفت: تاجیکستان در عرصه بین‌المللی به حیث یک کشور پیشرفته در حلّ مسائل مبرم امنیتی، آب و اکولوژی و تغییریابی اقلیم دستاوردهای خاص دارد. آقای امام علی رحمان اضافه نمود: به هیچ کشور پوشیده نیست، که تاجیکستان در خطّ پیش مبارزه بر ضد تهدید و خطرهای زمان معاصر قرار داشته و در تأمین امنیت منطقه نقش مهم دارد، از این لحاظ، ما منبعد نیز با کشورهای منطقه و همجوار، از جمله با جمهوری اسلامی افغانستان و دیگر شریکان خود همکاری خاص و سودمند را در ساحه امنیت ادامه خواهیم داد، ما اطمینان داریم، که ثبات و امنیت پایدار در جمهوری اسلامی افغانستان تنها از طریق روند صلحی که از جانب حکومت افغانستان و مردم آن اداره، نظارت و پیش برده شود، میسر بوده و یک صلح آبرومندانه و دوامدار خواهد بود.
پیشوای ملت تاجیکستان( محترم امام علی رحمان)، در ادامه سخنانش از معرفی شایسته نقشه‌های بنیادکارانه، اقدام های صلح‌جویانه، عزم و نیت های نیک و سازنده تاجیکستان در عرصه جهانی، همچنین، حضور فعال کشور کشور تاجیکستان در روند حلّ و فصل مشکلات عالم معاصر یادآوری نموده، گفت: ما در آینده نیز فعالیّت بین‌المللی خود را مطابق به مقرّرات پذیرفته شده سیاست خارجی دولتمان با سعی و تلاش بیشتر ادامه خواهیم داد و از روند صلح افغانستان که منجر به تامین امنیت پایدار کشور افغانستان به عنوان کشور همسایه، هم زبان و هم فرهنگ شود، استقبال نموده، حمایت قاطع می نماییم.
قابل یادآوری است که افغانستان و تاجیکستان، منافع مشترک تجاری و امنیتی دارند. هر دو کشور قربانی تندروی بوده، جنگ و نا امنی مانع بزرگی فرا راه انتگراسیون منطقه‌ای و رشد اقتصادی است. بنابراین نیاز است که افغانستان و تاجیکستان همکاری‌های امنیتی خود را بیشتر بسازند. ناامنی در بخش‌هایی از ولایات بدخشان، تخار و کندز، تاجیکستان را نگران کرده است. یک‌عده از جنگ جویان خارجی که در کنار طالبان در این ولایات می‌جنگند، تعلق‌تباری به ملت‌های آسیای میانه دارند. این جنگ جویان برای کشورهای آسیای میانه از جمله تاجیکستان، یک تهدید امنیتی شمرده می‌شوند. همین تهدید‌های امنیتی سبب شد تا دولت تاجیکستان، کنسولگری‌اش را در شهر کندز تعطیل کند.
در حوزه امنیت، باید هر دو کشور افغانستان و تاجیکستان همکاری نمایند، جلو قاچاق مواد مخدر و اقتصاد جرمی را بگیرند و اجازه ندهند که جنگ جویان از این ناحیه تمویل شوند. همچنین دولت تاجیکستان می‌تواند در زمینه مبارزه با مواد مخدر، مرزبانی و مقابله با جنگ جویان، تجربه‌هایش را در اختیار دولت افغانستان بگذارد.
همکاری‌های فرهنگی، مبادله دانشجو و برگزاری نشست‌های مشترک علمی و فرهنگی، عرصه دیگری است که دولت‌های افغانستان و تاجیکستان باید به آن توجه کنند. گسترش بازرگانی میان دو کشور ایجاب تسهیلاتی را می‌کند که باید دو دولت روی آن توافق کنند. دو دولت باید گسترش بیشتر مناسبات بازرگانی، امنیتی و فرهنگی را در دستور کار خود قرار دهند.
روشن است که برخی از حلقات بنیاد‌گرا در منطقه، نمی‌خواهند که دولت‌ها از طریق مناسبات اقتصادی و فرهنگی به هم‌دیگر نزدیک شوند. این حلقات در تلاش‌اند تا با گسترش بنیادگرایی، برای خودشان ساحه نفوذ ایجاد کنند. افغانستان و تاجیکستان می‌توانند با گسترش مناسبات‌شان، به این حلقات ثابت کنند که برای گسترش نفوذ، به‌جای راه، بی‌راهه را انتخاب کرده‌اند.
عزم جدی و حمایت حکومت و رییس جمهور تاجیکستان از روند صلح افغانستان درین مقطع حساس تاریخی برای دولت و مردم افغانستان حایز اهمیت است و شهروندان افغانستان از آن بخوبی استقبال می نمایند.
Comments are closed.